ليش ما تزوجتي؟

نص الحلقة :

منار :" لهلا اليوم بسمع كلام كتير مثل يا حرام وكيف وليش ، المجتمع بيوجع برأسك وبيحسسك انه إنتي ناقصة "

هبة جوهر : "  بكرة بيفوت هيك قطار العمر بدنا نفرح فيكي ليش ما تزوجتي لهلا ، بكره بتكبري لحالك ، معقول ما تزوجتي لهلا ، كل هاي عبارات بتسمعها البنت اول ما تصير بعمر مناسب للزواج واذا ما إتزوجت بيضل في وصمة مرافقاها طول العمر ، هاي التجربة بتمر فيها كتير من السيدات في حلقة اليوم من بودكاست قصتها القصيرة راح نسأل شو يعني توصلي بعد سن ال ٤٠ وما تتزوجي "

منار : " يعني هذا السؤال شو يعني توصلي لعمر بعد ال ٤٠ وما تكوني إتزوجتي ، هذا السؤال كنت كتير بسأله لحالي بس قبل ما أصير ٤٠ بس هلا ما إله أي وجود في الحياة ، انا مقتنعة انه الزواج مش كل إشي ، ما في إشي فاتني وعادي جدا اني ما إتزوجت في سن ال٤٠ ، أكيد الموضوع في كتير تحديات ، أكيد الموضوع لهلا اليوم بسمع كلام كتير مثل يا حرام وكيف وليش ،وهيكي مثل شوية جمل "ماشاء الله عليكي حلوة ليش ما إتزوجتي ، ماشاء الله عليكي  متعلمة ليش ما إتزوجتي ،  وهو سؤال ليش ما إتزوجتي لهلا وهاد صراحة ما إله إجابة واضحة ليه ما اتزوجتي لهلا ،سؤال بلا إجابة واضحة "

هبة جوهر : " عمر منار ٤٥ سنة وما إتزوجت لهلا ، الناس الي حواليها بدو يسألوها عن الموضوع من لما كانت بال٢٠ وطبعا هاي الأسئلة والنظرات صارت تزيد كل ما كبرت "

منار : " أكيد أول ما وصلت على الجامعة صرت بعمر ال٢٠ ، بدأ الحكي على انه يعني شو ما في حدا حواليكي ، شو ما حبيتي ، ما اتعرفتي على حدا ، شو متى بدنا نفرح فيكي ،هذا الحكي مش كتير كبير ولا متكرر خاصة انه أنا عايشة بمجتمع وببيئة متعلمة ومهم بالنسبة لإلها انه البنت بس تأخذ شهادة بس بنفس الوقت هاي الأسئلة كانت تضل تنسألي ، هاي الاسئلة اضل اتعرضلها وهيكي بأي قعدة بأي جمعة بأي مكان كان يصير ، كنت انسئل هاي السؤال من الجميع من الكل بعد ما اتخرجت طبعا الكلمة الي كنت اسمعها مبرووك يالا عقبال الفرحة ، مبرووك ان شاء الله بنفرح فيكي ، مبرووك عقبال ما نزورك ببيتك ، فكانت كل المواضيع إلها برده علاقة بانه لازم يعني بعد التخرج البنت تتزوج ، ما كان في حكي مثلا يالا ان شاء الله منها للأعلى ، ان شاء الله بنشوفك بمركز أحسن ، وين بدك تشتغلي ، لقيتي وظيفة ولا لا ، كانت كل الأسئلة إلها علاقة في موضوع الزواج او مش الاسئلة خلينا نحكي المباركات الناس الي تباركلي كانوا كلياتهم بيحكوا في موضوع الزواج بيحكوا عن موضوع إله علاقة بالبيت وكإنه ما في أشي تاني ممكن تعمله أي بنت غير انها تتزوج وتكون قاعدة في بيتها وانها تعمل أسرة وانها تصير أم طبعا هذا الموضوع مهم وانا ما بكذب اليوم اذا بحكي انه هاي الموضوع ما كان ببالي بهذه الفترة مش بس بهذه الفترة فترات مختلفة في حياتي وبكل حياتي ، أنا زي ما حكيتلك ضليتني افكر بموضوع الزواج ومتى راح اتزوج حتى لوصلت لل ٤٠ وانا بفكر فيها ، أنا اليوم عمري ٤٥ سنة ومش متزوجة ومش حاسه انه هذا الموضوع شكلي عائق ولكن ضل سؤال بيتكرر براسي بنسئله وبنسئل عنه بسأل حالي فيه هل أنا لازم اليوم اتزوج ، متى راح أصير أم طبعا هذا الحكي بيزيد بفترات وبيقل بفترات ، وبأعمار مختلفة بيختلف الموضوع وبيختلف الشعور معه كل مرحلة بعمري كانت فكرتي عن الزواج مختلفة عن التانية ، حتى اليوم ما بقدر انه راح تماما بس يمكن طريقة تفكيري فيه اتغيرت ١٨٠ درجة ."

هبة جوهر : " لكل عمر مشاعره وتفاصيله بحكم التجارب الي بيمر فيها الانسان وهذا الإشي بينعكس على كل إشي حتى موضوع الزواج ، منار كانت تشوف الزواج بكل عمر من منظور مختلف "

منار : " طريقة تفكيري في الزواج من سن لسن اتغيرت أكيد كيف وليش ، بعمر ال٢٠ أكيد كنت لسه أصغر كانت الأحلام إلها علاقة بانه أنا  بس اصبيت بدي يكون عندي زوج  ولأنه بمجتمعنا كمان بيسمح للبنت تعمل أشياء ما كان يسمحلها فيها قبل الزواج يعني انه لما تتزوج بيصير مسموحلها تعمل شئ مثلا ممنوعات كانت موجوده عند أهلها حتى بالمجتمع بتلاقيه بيتقبل هذا الموضوع أكثر ، فكنت أفكر انه حجم الحرية الي راح آخذه كمان في بيت زوجي أكبر إنه راح الاقي شخص أسافر معه كل العالم بلف وكانت هاي فكرة انه ما راح اجيب ولاد طبعا احلام ، ما راح اجيب ولاد بأول فترة بزواجي بدي اقعد هيك ٤ سنين وأنا مع زوجي وأكيد راح أتزوج حدا هيخليني أشتغل وبيدعمني وكتير قصص كانت يعني سوري كانت كتير وردية وكتير حلوة على موضوع الزواج ، هذا طبعا الموضوع كلياته اتغير بال ٣٠ من العمر ، فترة الثلاثينات بيكون في أشي إليه علاقة بانه انا بدي اتزوج لأعمل أسرة ، أنا بدي أتزوج لأصير ماما ، أنا بدي أتزوج لأني كبرت ، أنا بدي أتزوج لأنه صاحباتي والي بعمري صار عندهم أولاد، ولادهم عم بيفوتوا بالمدرسة  ، ولادهم بصفوف كبيرة وأنا لسه ما اتزوجت وأنا لسه بفكر أي حدا و احبه ، لسه بفكر أشوف شخص مناسب واحكي بتصير اهتمامات اخواتك واهتماماتك ما بتشبه بعض حتي في القعدات الي بتقعديها بيصير في اختلافات كتير كبيرة بيناتكم ، بيصير هما بوادي وانتي بوادي ، بيصيروا هما بيحكوا عن تفاصيل حياتهم ، بتحكي حدا عن حماتها ممكن عن ولادها ممكن عن المدارس يعني كتير بتكون القصص مختلفة بينكم وبين بعض فعلشان هيك بتحسي انا اه انا بدي اتزوج او انا بطلت بهاي العالم او انا صرت ٣٠ ولسه عندي قصص مثل بنات العشرينات فبتصيري حاسه انه انتي كأنك خارج يعني انتي بره كل هذا الكلام الي بيحكوه صاحباتك انتي بره هذا العالم ، طبعا وهاي الأسئلة بتزيد تبعك بدنا نفرح فيكي ، ليش ما اتزوجتي لهلا ، يا حبيبتي ان شاء الله تتزوجي وطبعا كل ما كبرتي أكتر كل ما تحسي فيه نظرة إلها دخل بشفقة وهما عم يحكولك هاي الحكي كل ما لمستيها أكتر من عيون الناس كل ما حسيتيها أكتر ، الأهل ،مخاوف الأهل ، مخاوف الأم و الأب ،كلياتها  بتصير بعمر ال٣٠ بتزيد فتعطيكي مع الموضوع بيختلف فيمكن بال ٢٠ كنت أحلم بفارس الأحلام بس بال ٣٠ صرت أحلم بأنه لازم أصير أم "

هبة جوهر " :  بس شو بيصير بعد ال٤٠ ؟ وكيف بتصير نظرة المجتمع للسيدة الي ما اتزوجت ؟ وكيف هي بتحس بس توصل لل ٤٠ ؟"

منار : " شو صار بعد ما صرت عمري ٤٠ ، ما صار إشي ما بعرف كيف راح الموضوع من بالي و ما كمان راح علشان اكون كتير صريحة ، أول شي لما صار عمري ٤٠ انا عملت عيد ميلاد كتير كبير وكنت مبسوطة ، فانا بعتبر انه يعني العمر بس مجرد رقم ، انتي تريدي تنبسطي وتنجزي وتكوني مبسوطة في حياتك بدون ما تطلعي شو عمرك فيه ناس كتير عمرهم ٢٠ وهما كأن عمرهم ٥٠ سنة ، انا بحكي عن نفسيتهم وكيف هما بيتاعملوا مع الأشياء ، انا لا لما صرت ال٤٠ حسين انه انا لسه بالشباب وعقلي شباب ولساتني صغيرة فما كنا عندي مشكلة وال ٤٠ عمر مختلف فعادي عملتله عيد ميلاد اما كيف اتغير طريقة تفكيري للموضوع اتغيرت بحكم العمر بحكم التجارب الي عايشتها وعيشتها بحكم انه انتي الإشي الي كنتي خايفة منه بيختفي يعني انتي كنتي خايفة ما تصيري أم أو أو أو  خلاص فيكي تقتنعي صار أمر واقع وانتي ما هتصيري أم بس لهلا انا ما بقدر أستوعب انه الناس الي بتتطلع عليكي بهذا العمر وانتي لسه ما اتزوجتي او ما اخدتي هاي الفرصة في الحياة ، بيطلعوا عليكي بنظرة ناقصة والمجتمع هيك بيطلع عليكي وأهلك هيك بيطلعوا عليكي وكل الي حواليكي هيك بيطلعوا عليكي ، زملائك بالعمل هيك بيطلعوا عليكي ، مديرك هيك بيطلع عليكي ، تكرار قصة انه يعني على سيرة العمل انه تكرار فكرة انه اه يا ماما انتي ما عندك ولاد ما في وراكي ولا قدامك إشي هاي العبارة بتضل تتكرر وهي مش عبارة حلوة دائما بتسمعها بكل الأوقات ،المجتمع بيضل يطلع عليكي انك انتي ناقصة انه انتي ما عندك ولاد ، شو ما حققتي بشغلك شو ما حققتي بحياتك شو ما اثبتي انه انتي شخص كامل ومتكامل و مش ناقصك ولا أي إشي المحتمع بيوجع برأسك وبيحسسك انه انتي ناقصة وصراحة كتير مرات بطلع الى لقاءات الفنانين والفنانات بالخصوص لما واحدة مثلا بتكون كتير كبيرة ويقابلوها وبتحكي انه هي ندمانه انه هي ما صارت أم بفكر كتير انه اذا وصلت لعمر أكبر من هيك كيف راح يكون في عندي احساس تجاه هذا الموضوع فبيرجع القلق عندي وبيرجع فكرة انه الزعل والحزن ،فموضوع  الزواج ليش ما اتزوجتي ويا حرام بيضل معاكي طول الوقت يممكن حتى لو انتي اتجاوزتي هاي القصة المجتمع بيرجع بيذكرك فيها كل مرة "

هبة جوهر : " قطار العمر ما بيفوت حدا ، الكل بيركب فيه وبيعيش تجربته الخاصة بدون ما يكون فيه تجربة نعممها على الجميع والعمر و الحب ما إله عمر معين ومعاني الأمان مختلفة من شخص للتاني "

منار : " شو بحلم ، بحلم احقق نجاح بشغلي ،أمن حالي أكتر من ناحية مادية أو أمن لكبري لأنه برده كل الحياة او تجارب الي حوالينا وحكي ناس بيبين انه انتي لازم تدير بالك على كبرك  ولأنه بيحكوا انه ما في ولد بيدير باله عليكي فإنتي لازم تأمني لمستقبلك هذا الي عم بعمله عم بأمن لمستقبلي  وانا عم بحكي عن مستقبلي لما أكبر وأكون عايشة لحالي كيف شكل الحياة راح تكون ، هذا هو اكتر إشي بأمن عليه اما بالنسبة للزواج فطبعا لسه وارد إذا لقيت الشخص المناسب "